【特奧社區-關愛健康計劃】關愛自己多一點 之 耳仔清潔之道(一)

23 五月 2023

大家沖完涼後，有冇用棉花棒清潔耳仔或清理耳垢嘅習慣？其實我哋到底需唔需要清理耳垢，又應該點樣清理呢？今期特奧社區-關愛健康計劃 之 關愛自己多一點就要教教大家如何正確清潔耳朵同使用棉花棒。

耳垢嘅學名叫耵聹，即係大家平時俗稱嘅「耳屎」。其實佢係有保護同保持耳道清潔、防止灰塵、昆蟲同細菌入侵嘅作用。????而耳垢係無需要刻意清理架，會隨住說話、進食等需要咬合嘅動作，自然咁排出到外耳道。

正常情況下耳屎會自動排出外耳道，所以我哋真正需要使用棉花棒清潔嘅，正係外耳廓嘅部分，而唔係伸入耳道。

但點解有啲人用棉花棒清潔耳朵時會受傷？就係因為施力不當造成耳道破損，甚至感染；或令耳垢推到耳道更裡面嘅位置，引至耳垢堆積；如果唔小心刺穿耳膜，嚴重嘅會造成失聰。

因此大家要學會正確使用棉花棒清潔耳朵。如果出現聽力下降、耳塞、耳鳴、疼痛、流出液體等情況，就要揾醫生做檢查啦！