【2024回星行動】精英領袖培訓活動

21 十一月 2024

先前回星行動舉辦咗精英領袖培訓活動。雖然我哋好多同學仔都有參加過之前嘅生活營，但我哋每年最期待嘅都係精英領袖培訓生活！

因為今次除咗會俾我哋自己嘗試獨立生活之外，仲會有好多團體嘅遊戲。過程入面，我哋個個都玩得好開心~今次嘅遊戲唔似平時嘅咁簡單，都係需要團體合作同埋溝通先可以完成到，大家齊齊邊學邊玩啊！

而我哋今次嘅晚飯，都係要靠自己去完成。平時義工哥哥姐姐會幫我哋煮嘢食，而精英領袖培訓活動，就輪到我哋自己燒返嘢食俾佢哋食喇。

食完晚飯之後仲有好特別嘅活動啊，你估吓係咩？等我話俾你知啦，係玩仙女棒啊，真係玩得超開心！今次天氣好好，我哋仲去埋放風箏，又開心又解壓~

話咁快就完咗今年嘅生活營，希望下年快啲嚟到，大家再一齊參加啦！