【樂動融2025】 「融義玩」社區推廣嘉年華即將喺5月18日登場！

28 四月 2025

今年「融義玩」社區推廣嘉年華舉辦當日正正就係一年一度嘅「全國助殘日」，實在係意義非凡！自1991年開始，《中華人民共和國殘疾人保障法》規定每年五月第三個星期日為「全國助殘日」，並且依照每年主題展開各式嘅助殘活動，提倡關注殘疾人權益、提升殘疾人生活質量。

除咗活動當日係「全國助殘日」，嚟緊12月更係粵港澳大灣區舉行「全殘特奧運會」，而澳門賽區亦將會承辦殘特奧嘅羽毛球比賽項目。藉著呢個千載難逢嘅機會，我哋都希望可以透過「融義玩」社區推廣嘉年華讓大衆更加認識同了解我哋特奧會嘅運動員，推廣共融平等，為佢哋參與體育運動嘅路上加油打氣！

活動當日會有一連串以「全國助殘日」以及「全殘特奧運會」作為主題的共融攤位遊戲等大家一齊嚟鬥智鬥勇~ 更加唔少得特奧運動體驗俾大家大展身手，讓大家可以喺遊戲當中體驗特奧運動員喺比賽當中所需要嘅技能~ 玩到肚餓都唔緊要，同場仲有美食攤位滿足各位嘅肚皮~

活動時間：5月18日下午3點至9點
活動地點：塔石廣場

另外現場亦有慈善手作坊同步進行，如果想報名嘅朋友仔快啲掃code霸位啦，名額有限，先到先得！咁精彩嘅活動點可以冇幸運大抽獎呢？只要集齊“Play” “Unified” “Play” “Sports” 4個紀念幣，即可參加抽獎！點先可以收集？請繼續留意我哋FB 專頁啦！