【特奧社區-關愛健康計劃】關愛自己多一點 之 耳仔清潔之道(二)

30 五月 2023

上星期同大家分享咗點樣正確使用棉花棒清理耳垢從而避免受傷。但日常生活中沖涼、洗頭、游水等活動，都會有機會令耳仔入水，當耳仔入水後又冇好好處理的話，就會有機會產生霉菌或細菌感染，引致外耳道發炎。所以今日要同大家分享嘅，就係耳仔入水嘅處理方法。

方法一：温柔地吹乾！將耳廓輕輕向後上拉，將風筒調至冷風及弱風，放遠一啲温柔地吹乾耳仔。

方法二：單腳跳！單腳跳係平時最多人會建議嘅方法，只要將頭側向入水嘅一面單腳跳。令耳仔中嘅水隨身體活動流出，同時亦要緊記安全。

方法三：輕輕印！將頭側向入水嘅一面，用棉花棒或紙巾，輕按外耳道嘅開口，將水吸出嚟，但謹記切勿伸入外耳道。

方法四：自然流出！水亦會隨住日常說話、咀嚼和顳顎關節活動嘅同時慢慢流出。

切記注意安全同唔好用手指或其他工具亂挖耳朵，亦唔建議用力敲打頭部，咁做並唔會搖出積水，反而會容易導致受傷。不過如果試過呢幾個方法都唔得的話，就要去搵醫生檢查一下啦，及早治療，預防發炎！

溫馨提示﹕如果大家經常有水上活動，應該避免耳朵經常入水，因為耳道若反覆入水，容易誘發中耳炎，特別是游水時可以配戴耳塞，減少耳道進水嘅機會。

參考資料﹕
– 香港專科、”耳仔入水”怎麼辦？處理不當恐令耳朵發炎https://www.specialists.hk/tc/health_info_detail.php?info=364
– 上海市衛生健康委員會 http://wsjkw.sh.gov.cn/jthl/20210716/dd4a2eb7adf54f51bfe55d1e4ce6ac02.html