【2025回星行動】共融參觀活動

26 三月 2025

3月8日，回星行動當日真係天公作美啊！如果每次有參觀活動天氣都咁好就好啦~

當日行程好緊湊，我哋參觀咗蓮峯廟、普濟襌院、澳門回歸賀禮陳列館、金蓮花廣場同埋中華民族雕塑園。

常言道，讀萬卷書不如行萬里路，雖然我哋日日都住喺澳門，但其實澳門有好多地方我哋都未探索過！所以透過今次活動，成員們一齊了解多啲澳門嘅歷史文化。

唔嚟唔知道，原來民族英雄林則徐都有嚟過蓮峰廟㗎！而正正就係因為佢嚟過，所以蓮峰廟隔離就修建咗林則徐紀念館。

澳門回歸賀禮陳列館入面擺放咗各地送俾澳門嘅禮物，所有禮物都融入咗當地嘅特色。真係好靚啊！相信係好快嘅將來，我哋一定可以親身去感受當地嘅文化。

今次參觀活動大家都學到好多嘢，好期待下次嘅參觀活動啊！