【2025回星行動】共融成長系列活動：中山生活營

17 九月 2025

8月11、12日，迎嚟一年一度嘅生活營！唔知今年生活營會有咩活動呢？當然唔少得玩遊戲嘅環節啦~除咗合作嘅遊戲之外，仲有關於默契嘅遊戲。大家一齊溝通、合作先可以順利完成目標！玩咗咁多動態嘅遊戲，係時候休息下喇！

唔係淨係瞓覺先叫休息嘅，做藝術作品都係一個好好嘅放鬆活動。今次嘅藝術作品係咩呢？係畫草帽啊！每個人都可以創作獨一無二屬於自己嘅草帽。大家嚟細心欣賞下我哋嘅作品，睇下之後我哋嘅草帽去咗邊？

玩咗成日遊戲，相信每一位學員同義工哥哥姐姐都玩得好開心又有好多收穫啊！除咗開心之外，相信大家都肚餓喇。回星生活營嘅傳統係：自己動手！所以每個人都要幫手煮晚餐！

原來煮晚餐一啲都唔簡單！因為我哋今次係野炊活動，所以需要自己生火、燒火柴、洗菜、煮菜等等。哇！原來食完飯之後仲有驚喜等緊大家，就係生日蛋糕啦！一齊為八月生日嘅壽星慶祝生日，仲有西瓜食，食完真係好舒服、好涼爽啊！

食飽之後我哋又有唔同嘅遊戲喇玩，今次嚟夜間矇眼體驗。過程真係又緊張又刺激啊！最後我哋仲一齊玩仙女棒，今日嘅活動真係好豐富啊！

嚟到第二日，大家依然精力旺盛！天氣咁熱，如果有得玩水就好喇！咦？原來真係有得玩水啊！水球大戰真係好刺激啊！

短短兩日一夜嘅生活營，為我哋留低咗好多珍貴嘅回憶！

點擊連結觀看精彩回顧：https://www.facebook.com/share/v/1KTUWsagvP/