小記者·真體驗

13 八月 2020

上週（7/8-9/8）“轟動”全澳嘅金沙物美嘉年華活動熱火朝天地進行，吸引咗唔少市民參與~當中嘅特奧攤位亦有賴大家嘅愛心支持而取得非常不俗嘅成績!

而喺咁熱鬧嘅活動又點少得我哋特奧學員嘅身影咧~今次活動特奧小記者們好榮幸可以受到金沙中國邀請參與成為活動記者，希望可以透過拍攝、記錄、採訪現場等讓特奧小記者體驗如何成為一名正式記者，感受真正記者嘅採訪拍攝工作!

特奧小記者仲參與咗“小廚神工作坊”，好好咁體驗咗一番蛋糕製作樂趣喔~小記者們一邊製作蛋糕，一邊對活動進行拍攝記錄，喺另一方面都鍛煉咗記者小技能，係一次不一樣嘅體驗！

今次記者體驗機會難得，特奧學員都非常珍惜，喺特奧導師的帶領下，每個人都非常踴躍投入到採訪和記錄現場嘅任務裡面。

雖然小記者剛開始會害羞膽小不敢向前，但最後喺互相噶鼓勵下大家都一齊突破自我，努力完成一個又一個嘅採訪，比個大讚佢哋~

「特奧小記者培訓計劃」以寫作及攝影教學培訓為主，培訓特奧學員記者基礎技能，並同時進行定期撰寫新聞文章報導的實踐訓練。日後將持續多元化發展以此培養特殊青少年作未來的社會棟樑及青年領袖。